Tallo a Mexicano

Adtoy man ti maysa a burtia-an (puzzle iti Ingles) a pangpadasanyo a warwaren ti utekyo.

Adda tallo a Mexicano nga agga-gayyem a nakakallugong a kas makita iti retrato iti kannigid. Ti naganda ket Juan, Julio ken Pedro.

A kas makita iti retrato, dua iti nakakallugong iti nangisit, maysa iti saan a nangisit (ipapantayo laengen a puraw). Ita, inikkatda dagiti kallugongda ket ingkabilda iti maysa a supot. Timmakder dagitoy tallo a Mexicano. Nakaliniada a nakatakder a nakasango amin iti amianan. Ni Pedro ket adda iti likod da Julio ken Juan. Ni Julio ket adda iti likod ni Juan.

Iti sabali a pannao, ni Pedro saana a makita ti ulona ngem makitana ti ul-ulo da Julio ken Juan. Ni Julio ket saanna a makita ti ulona ken ti ulo ni Pedro ngem makitana ti ulo ni Juan. Ni Juan ket saanna a makita ti ulona ken ti ul-ulo da Julio ken Pedro. Iti ababa a pannao, awan a pulos ti ulo a makita ni Juan (Kitaen ti “sketch”. Saan a makita no ania ti maris dagiti kallugong tapno adda kenka a mangpanunot).




Itan kinulogkulogmo ti supot a nakaykargaan dagiti tallo a kallugongda samo inkallugong tunggal maysa kadakuada. Ingkabilmo dagiti kallugong manipud iti likodanda tapno saanda a makitkita no ania ti maris (color iti Ingles) ti kallugong nga adda iti ul-uloda.

Kuna ni Pedro, “Ammok ti maris ti kallugong nga adda iti ulok!”

Kuna ni Julio, “Saanko nga ammo ti maris ti kallugong nga adda iti ulok!”

Kuna ti Juan, “Ammok ti maris ti kallugong nga adda iti ulok!”

Ngarud, dagitoy ti saludsod ti burtia-an:

A. Ania ti maris ti kallugong ni Juan?

B. Kasano ti pannaka-ammo ni Juan ti maris ti kallugongna uray no awan a pulos ti makitana nga ul-ulo ken kalkallugong?

Masdaawka ngata, kabsat, no kasano ti pannakaamo ni Juan ti maris ti kallugongna uray no awan a pulos ti kallugong a makitana ngem napintas ti sungbat ti daytoy a burtia-an. Sakbay a siripem ti sungbat ti burtia-an, irugimon, kabsat, nga asaen ti utekmo. Ti utek ket kasla iti buneng a no saan a maasa, ngumudel ken no nabayag a saan a maasa, aglati!

Sungbat ti Burtia-an:

A. Nangisit ti maris ti kallugong ni Juan.

B. Apay a nangisit? Imbasar ni Juan ti pannakaammona iti maris ti kallugongna babaen iti sungbat ni Julio. Kastoy ti lohika (logic iti Ingles) nga inusar ni Juan:
“No puraw ti kallugongko, sigurado nga ammo ni Julio ti maris ti kallugongna ta ti maris dagiti natda a kallugong a dua ket agpadpada a nangisit.
No nangisit ti kallugongko, saan nga ammo ni Julio ti maris ti kallugongna ta ti maris dagiti natda a kallugong a dua ket nangisit ti maysa ket puraw ti maykaddua.
Kuna ni Julio a saanna nga ammo ti maris ti kallugongna, ngarud ti kallugongko ket nangisit!”