Maminsan Pay *

Impasay-opmo kaniak ti ayamu-om ti nasam-it a sabsabong
Impariknam kaniak ti kinabara dayta barukong
Binangonmo ti natibker a bato nga innak nagsanggiran
Intedko met kenka ti ayatko a naylangitan.

Awan ti palimed nga ilemlemmengta
Nagkarita a dua,
Nagsapatata
Denggem daytoy ibagak kenka.

Saanmo koma nga ipaidam ti ayatmo ita a rabii
Saan a dakkel a basol ti maysa a kamali
Mangrugita manen, biagko
No ipaaymo kaniak ti ayatmo
Kenka ti ayatko innak met ipaay
Maminsan pay.

Dagiti nalamiis nga angin, kinunam, umayto
Mangted iti tayegteg iti maysa a nalukneng a puso
Kunak met, kibinennak ta irugitan nga iyaskaw dagiti sakata
Kaykayatmo kadi ti magna nga agmaymaysa?
Ti kinapalangguad, a kas ti kinaagum
Ket kasla kaapges ti tudok ti maysa a natadem a dagum
Ngem uray no kasta, biagko, iti kaunggan ti pusok adda pammakawan
A mang-anninek ti taaw ken ti dalluyon a maburak iti kadaratan.

Kunada nga amin a banag ditoy lubong ket mapukaw
Kasla ti arabaab nga umay ngem kalpasanna pumanaw
Ti panagdaldaliasatta ket alaenna ti sibubukel a panagbiagta
Saanko a mabalin nga ibabawi ti ayat nga impaayko kenka.

Ibagak manen kenka
Saanmo koma nga ipaidam ti ayatmo ita a rabii
Saan a dakkel a basol ti maysa a kamali
Mangrugita manen, biagko
No ipaaymo kaniak ti ayatmo
Kenka ti ayatko innak met ipaay
Maminsan pay.


*Naadaw iti maysa a kanta.