Ti Dara A Nangisalakan Kaniak *

Nagubbog ti dara iti likodmo
Iti tallo pulo ket siam a saplit!
Nagubbog ti dara iti mugingmo
Ta kinoronaanda ti ulom iti siit!
Nagubbog ti dara dagiti tumengmo
Nagubbog ti dara iti rupam
Gapu ti pannakaydaramudommo
Iti kinadagsen ti krus nga inamitmo!
Nagubbog ti dara dagiti sakam
Nagubbog ti dara dagiti imam
Kadagiti lansa a naypalok!
Nagubbog ti dara ken danum iti bakrangmo
Iti natadem a lanseta a nayduyok!
Nalabbaga ti dara a nangdigos
Ti nakaylansaam a krus!
Aglulua dagitoy matak
Ta no man pay nakakaskas-ang
Dagitoy linak-ammo ditoy daga
Indawatmo, "Ama, pakawanem koma ida
Ta saanda nga ammo ti ar-aramidenda!".


* Napa-uluan iti "Dardara a Nagubbog" iti Iluko.com