Agpatpatangkayo iti maysa a tao. Iti rugina, napintas ti taray ti saritaan. Pagammuan, bigla a sinalungasingna amin a balikas a saw-em agingga ti di nakaysawang ti balikas a nangpasakit iti riknam. Bimmara ti pispismo. Ket dayta a kanito, kayatmon a disnogen (no lalakika) wenno pungoten (no babaika).
Ti kinaalipunget, rurod, unget, pungtot wenno ania man ditan a pang-awagmo no agpudot ti ulom ket saan a nasalun-at no saanmo nga ammo a maneharen. Ti dakesna, dadaelenna pay ti nasayaat a relasionmo kadagiti padam a tao.
No agpudot ti ulom, ngumato ti presionmo (blood pressure iti Ingles). No bigla a ngumato ti presionmo, saanmo a mapakpakadaan ngem mabalin nga agatakeka iti puso.
Tallo dagiti banag no kasano ti “panangiyebkas”mo ti kinapudot ti ulom.
Umuna, sigida a pannakilinnaban (balikas man wenno pisikal) iti tao a nangdunor ti riknam.
Maikaddua, ilemmengmo ti panagpudot ti ulom. No dadduma, saan a napintas daytoy ta agturong daytoy iti panagladladingitmo nga agmaymaysa. Ken,
maikatlo, adaywam ti nangpataud ti panagpudot ti ulom. Ngem ti dakesna daytoy, gayyem, ket mapanmo met ipapas ti pudotmo kadagiti sabali.
Ti sursurom iti uneg ti balay a dimmakkelam, dagiti kaarrubam a kinnalinnangenmo nanipud pay iti kinaubingmo, dakkel ti tunnoyda no kasano ti panangiyebkasmo ti panagpudot ti ulom. Imbagada kadi kenka a ti panagpudot ti ulo ket saan a nasayaat a rikna ket, gapu daytoy, masapul nga “ilemmengmo” wenno "kemkemem" dita barukongmo?
No saanmo nga ammo a maneharen ti panagpudot ti ulom, agturong daytoy iti saan a nasayaat a banag.
