Ni
Leonardo da Vinci (nayanak idi Abril 1452, natay idi Mayo 1519) ket maysa kadagiti agkakalaingan (no di isu ti kalaingan) nga agpinpintura iti panawenna. Italiano isuna ken, ti kinaagpaysona, awan ti apelyidona. Ti kayat a saw-en dagita balikas a “da Vinci” ket “taga-Vinci” (Ti “Vinci” ket nagan ti maysa a lugar). Isu nga no Leonardo da Vinci kunam, ti kayatna a saw-en ket ni Leonardo a taga-Vinci- kasla koma no kunam, ni “lilongmo nga Usting a taga-La Union”, kdpy.
Dagiti dua a nalatak a ladawan nga pinintura ni Da Vinci ket ti “Mona Lisa” ken ti “Last Supper”. No nabasayo iti libro (wenno nabuyayo iti sine) ti “The Da Vinci Code”, kunada a ti tao iti kannawan ni Apo Jesus iti ladawan a “Last Supper” ket isu kano ni “managbasol” a Maria Magdalena iti Santa Biblia.
Makita ti baba ti “Mona Lisa” ken “Last Supper” a pinintura ni Da Vinci.
Ni met
Michelangelo di Lodovico Buonarroti Simoni (gapu ta atiddog unay daytoy a nagan tinawaganda laengen isuna ti
Michelangelo) ket nayanak idi Marso 1475, natay idi Pebrero 1564. Kasla kenni Da Vinci, ni Michelangelo ket maysa met nga Italiano ket kapanawenan met laeng ni Da Vinci. Nainget ti panagballubal dagitoy dua iti tay-ak ti panagpinturaan. No iyarigtayo iti panagsuratan ti literatura Ilocana, kasla koma kada Apo Agustin D.C. Rubin kenni Apo Art T. Ignacio.
Ti maysa a kalatakan a pinintura ni Michelangelo ket ti “The Last Judgement”. Pininturana daytoy iti diding ti altar ti Sistine Chapel (Maysa a kapilia iti Apostolic Palace a pagdidianan ti Santo Papa diay Vatican). Ti tema nga ipakita daytoy a ladawan ket ti maikaddua nga iyaay ni Apo Jesus ditoy lubong wenno panangukom. Ngem nagbalin a kontrobersial ti “The Last Judgement” idi panawen ni Michelangelo ta iti ladawan makita ti agtiltillayon a mabagbagi ti lalaki.
Makita ti baba ti “Last Judgement” a pininturana.
Ita a panawen, adu met dagiti nalaing ken nalatak nga agpinpintura. Adda met dagiti nalaing ngem saan a nalatak nga agpinpintura. Makita iti baba dagiti ehemplo ti gapuanan dagiti nalaing ngem saan a nalatak nga agpinpintura. Maylasinmo kadi no apay a sabsabali dagitoy a ladawan?
Ti ladawan ti elepante,
saanmo kadi a madlaw
nga ti agongna ket saan
unay nga atiddog?
Ti ladawan ti lalaki
a nagbarbas, saanmo
kadi a madlaw a ti
barbas iti timidna
ket nagpisi?
Apay a kasta, kunam?
naysupsupadi
dagitoy a ladawan
ta naipintada iti bagi
ti tao a kas makitam
iti ladladawan ti baba.
Hm, naangaw dagitoy nga agpinpintura!
