Apay A Makikabit Ti Maysa Nga Asawa

Kabit! Kamalala! Kerida (naggapu iti Espaniol a balikas a querida)! No dadduma awagan da pay iti “sugar mommy” wenno “sugar daddy”. Ngem uray no ania man ditan a pang-awagmo iti kabitmo (no adda man), apay a nakikabitka? Masapul kadi a makikabitka?

Nakikabitka kadi gapu ta naumakan iti asawam ket saankan a mapnek iti pannakikuam kaniana? Nabasak iti maysa nga artikulo iti web a saan laeng gayam daytoy iti maysa kadagiti rason no apay a nakikabit ti maysa nga asawa.

Dagitoy man dagiti sabali a rasrason.

Umuna unay, kuna ti artikulo, nakikabitka agsipud ta kayatmo nga aramiden daytoy a kasla “pangri-ing”mo iti asawam. Adda sabali a pagay-ayat nga aramiden ti asawam. Gapu daytoy, nagin-inot a napukaw iti "intresado"na kenka aginggana a naawanen a pulos ti tiempona a makilinna-ilo kenka. Managsugal- kas pagarigan- ti asawam. Kaykayatna ti mapan agsugal ngem iti makidenna kenka.

Maykaddua, nakikabitka agsipud ta kayatmo iti agibales. Sinaktan ti asawam ti riknam no ania man a gapu. Embes nga idiskusionmo iti asawam ti inaramidna kenka, biroken ti "pu-on" no apay a sinaktanna ti riknam, embes a kapatangmo ti asawam iti rupanrupa (bareng no mapalukayan ti dagensen iti barukogmo), nakikabitka ta kayatmo ti agibales.

Maykatlo, nakikabitka gapu ta ti relasionmo iti maysa kadagiti nasinged a pagayamyo nga agassawa ket nagbalin a nasinged unay! Ket, ‘nia pay ngarud, saanmon a nalapdan ti panunotmo ken bagim!


“Ipagarupko kasla ingkabsatan laeng ti riknana kaniak ngem idi nagpatpatangkami iti lamisaan, nariknak ti…”

Ken, maykapat, nakikabitka ta napukawmo ti respetom iti asawam no ania man ti gapuna.

Agpa-ut ken napintas ti relasionyo nga agassawa no natibker ti ayan-ayatyo a dua ken no adda talek iti tunggal maysa kaniayo a dua. No makikabitka, maminpinsan a mapukaw daytoy a talek. No mapukaw, maisubli pay ngata?


“Ikkannak koma iti maysa pay a gundaway, sika laeng ti pudno nga ayatko! Ikarik, saankonton nga aramiden ti...”

Agkatawatay' Man Biit!

Daytoy man ti maysa a pakatawa (joke iti Ingles)a napaellekak iti napalalo idi nabasak.

Adda tallo nga ubbing nga agdidinniskutir no ania ti parte ti bagi a kaasitgan iti Dios.




Kuna ti umuna nga ubing: Ti ulo ti kaasitgan iti Dios ta no nakatakderka, asideg ti ulo iti langit.

Kuna ti maikaddua nga ubing: Dagiti ima ti kaasitgan iti Dios ta no agkararagka usarem ti imam no agugiska.

Kuna ti maikatlo nga ubing: Dagiti saka ti kaasitgan iti Dios!

"Mauyongka kadi?" kuna ti umuna ken maikaddua nga ubing "No nakatakderka, dagiti saka ti kaadaywan iti langit!"

Insungbat ti maikatlo nga ubing, "Dagiti saka ti kaasitgan iti Dios! Idi rabii, iti kuarto da nanang ken tatang, nakitak ni nanang a nakangato dagiti sakana nga iyik-ikkisna 'Oh, my God! Oh, my God!'"